မိခင်နို့တိုက်ကျွေးခြင်း

မိခင်နို့တိုက်ကျွေးခြင်းသည် မိခင်နှင့်ကလေး အတူတကွ တွေ့ကြုံခံစားနိုင်သော သဘာဝအရှိဆုံးနှင့် အကျိုးရှိသော လုပ်ရပ်များထဲမှ တစ်ခုဖြစ်သည်။ သို့သော် နို့တိုက်ကျွေးခြင်းနှင့် ပတ်သက်၍ မိခင်အသစ်များအတွက် မေးခွန်းများနှင့် စိုးရိမ်ပူပန်မှုများ ရှိတတ်သည်။

• ဤပြည့်စုံသောလမ်းညွှန်ချက်တွင်၊ မိခင်နို့တိုက်ကျွေးခြင်းနှင့်ပတ်သက်၍ သင်သိထားရမည့်အရာအားလုံး၊ ၎င်း၏မြောက်မြားစွာသောအကျိုးကျေးဇူးများမှသည် အောင်မြင်မှုအတွက် လက်တွေ့ကျသောအကြံပြုချက်များအထိ စေ့စေ့စပ်စပ်လေ့လာပါမည်။
• မြှင့်တင်လိုသည်ဖြစ်စေ ဤအရင်းအမြစ်သည် အဖိုးတန်အချက်အလက်များနှင့် ခြေလှမ်းတိုင်းကို ပံ့ပိုးပေးရန် ရည်ရွယ်ပါသည်။

• ၁) မိခင်နှင့် ကလေးနှစ်ဦးလုံးအတွက်အာဟာရအကျိုးကျေးဇူးများ။
• ၂) မိခင်နှင့်ကလေးကြား ချစ်ခြင်းမေတ္တာတိုးပွားစေခြင်းနှင့် စိတ်ပိုင်းဆိုင်ရာ အကျိုးကျေးဇူးများ။
• ၃) ကလေးအတွက် ရေရှည်ကျန်းမာရေး အကျိုးကျေးဇူးများ။

မိခင်နို့တိုက်ကျွေးခြင်းအားဖြင့် မွေးကင်းစကလေးငယ်များနှင့် မိခင်များအတွက် နှိုင်းယှဉ်မရနိုင်သော အာဟာရအကျိုးကျေးဇူးများကို ရရှိစေနိုင်သည်။ မိခင်နို့တွင် ကြီးထွားလာသော ကလေးများ၏ အာဟာရလိုအပ်ချက်များကို ဖြည့်ဆည်းပေးရန်အတွက် ကာဗိုဟိုက်ဒရိတ်၊ ပရိုတင်း၊ အဆီ၊ ဗီတာမင်နှင့် သတ္တုဓာတ်များ စုံလင်စွာ ပါဝင်သည်။ ထို့အပြင် မိခင်နို့တွင် မွေးကင်းစကလေးများကို ရောဂါပိုးမွှားများနှင့် ရောဂါများမှကာကွယ်ပေးသည့် မရှိမဖြစ်လိုအပ်သော ပဋိပစ္စည်းများနှင့် ကိုယ်ခံအားနှင့်သက်ဆိုင်သော ပစ္စည်းများ ပါဝင်သည်။  မိခင်များအတွက်မူ နို့တိုက်ခြင်းသည် အောက်ဆီတိုစင်ဟော်မုန်း ထုတ်လွှတ်မှုကို လှုံ့ဆော်ပေးသဖြင့် မီးဖွားပြီးနောက်သားအိမ်ကျုံ့ခြင်းကို အားပေးပြီး မီးဖွားပြီးနောက် အနာကျက်ခြင်းကို မြန်စေခြင်း၊  မိခင်၏ ကိုယ်အလေးချိန်ကိုလည်း လျှော့ကျစေခြင်း စသဖြင့် အကျိုးကျေးဇူးရစေသည်။ ထို့အပြင် မိခင်နို့တိုက်ကျွေးခြင်းအားဖြင့် ရင်သားကင်ဆာ၊ သားအိမ်ကင်ဆာနှင့် ဆီးချိုရောဂါအပါအဝင် မိခင်များတွင် အချို့သော ကျန်းမာရေးအခြေအနေများ ဖြစ်နိုင်ခြေကို လျှော့ချပေးနိုင်သည်။

မိခင်နို့တိုက်ကျွေးခြင်းသည် မိခင်နှင့်သူ၏ကလေးကြားတွင် ခိုင်မာသော စိတ်ခံစားမှုဆိုင်ရာ ချည်နှောင်မှုကို တိုးပွားစေပြီး ရင်းနှီးမှု၊ လုံခြုံမှုနှင့် သက်သောင့်သက်သာဖြစ်သည့် ခံစားချက်တို့ကို မြှင့်တင်ပေးသည့် ထူးခြားပြီး ရင်းနှီးသောဆက်သွယ်မှုကို ဖန်တီးပေးသည်။ နို့တိုက်ခြင်းတွင် အရေပြားနှင့် အရေပြား ထိတွေ့ခြင်း၊ မျက်လုံးချင်း ထိတွေ့ခြင်းနှင့် နူးညံ့သိမ်မွေ့စွာ ပြုစုပျိုးထောင်ခြင်းတို့ ပါ၀င်ပြီး ချစ်ခြင်းမေတ္တာ ဟော်မုန်းဟု ရည်ညွှန်းလေ့ရှိသော အောက်ဆီတိုစင်ဟော်မုန်း ထုတ်ပေးခြင်းကို လှုံ့ဆော်ပေးသည်။ ထိုဟော်မုန်းသည် မိခင်နှင့် ကလေးနှစ်ဦးအကြား ချစ်ခြင်းမေတ္တာခိုင်မာစေခြင်း၊ စိတ်အပန်းပြေစေခြင်း နှင့် ကျန်းမာသည့် ခံစားချက်များကို တိုးပွားစေနိုင်သည်။ မိခင်နို့တိုက်ကျွေးခြင်းဖြင့် မိခင်များသည် မိမိတို့၏ရင်သွေး၏အရိပ်အကဲများကို နားလည်နိုင်စွမ်းတိုးမြှင့်စေပြီး ချက်ခြင်းတုံ့ပြန်နိုင်သောကြောင့် ကလေးကို လုံခြုံမှု၊ သက်တောင့်သက်သာဖြစ်မှုကို ပေးစွမ်းနိုင်ပြီး ကလေး၏စိတ်ချယုံကြည်မှုကို တည်ဆောက်နိုင်သည်။ မိခင်နို့တိုက်ကျွေးနေစဉ်အတွင်း ရယူတည်ဆောက်ထားသော မိခင်နှင့်ကလေး၏ ရုပ်ပိုင်းဆိုင်ရာနှင့် စိတ်ခံစားမှုဆိုင်ရာ ရင်းနှီးမှုသည် ရေရှည်တည်ဆောက်သွားရမည့် မိဘနှင့်ကလေးဆက်ဆံရေးအတွက် အကျိုးပြုနိုင်သည်။

မိခင်နို့တိုက်ကျွေးခြင်းသည် မွေးကင်းစကလေးငယ်များအတွက် လတ်တလောကျန်းမာရေး နှင့် ရေရှည်ကျန်းမာရေး အကျိုးကျေးဇူးများစွာကို ပေးစွမ်းနိုင်ပြီး နို့တိုက်ကျွေးနေစဉ်နှင့် နို့ဖြတ်ပြီးနောက်တွင်လည်း ၎င်းတို့၏ အလုံးစုံကျန်းမာရေးနှင့် ဖွံ့ဖြိုးမှုကို ကောင်းမွန်စေသည်။ မိခင်နို့သည် ကလေးများ၏ ဦးနှောက်ဖွံ့ဖြိုးစေရန်၊ မှတ်ဥာဏ်လုပ်ဆောင်မှုကောင်းစေရန် နှင့် အရိုးများသန်မာစေရန် ဆောင်ရွက်ပေးသည်။ မိခင်နို့တွင် ကလေးအတွက် လုံလောက်ပြည့်စုံသော အာဟာရနှင့် ကိုယ်ခံအားပစ္စည်းများ ပါဝင်သောကြောင့် ကလေးများတွင် အဖြစ်များသည့် အသက်ရှုလမ်းကြောင်းဆိုင်ရာ ကူးစက်ရောဂါများ၊ အစာအိမ်နှင့် အူလမ်းကြောင်းဆိုင်ရာ ကူးစက်ရောဂါများနှင့် ဓာတ်မတည့်မှုစသော ဖျားနာမှုခံစားရနိုင်ခြေများကို လျှော့ချပေးသည်။ ထို့အပြင် လေ့လာမှုများအရ မိခင်နို့တိုက်ကျွေးသော ကလေးငယ်များတွင် အဝလွန်ခြင်း၊ ဆီးချိုရောဂါ၊ ပန်းနာရင်ကျပ်ရောဂါ၊ ဓာတ်မတည့်ခြင်း၊ နားပိုးဝင်ခြင်း(နားပြည်ယိုခြင်း) နှင့် အသက်ကြီးလာသောအခါ အစာအိမ်နှင့် အူလမ်းကြောင်းဆိုင်ရာ ရောဂါများကဲ့သို့သော အခြေအနေများ ဖြစ်ပွားနိုင်ခြေ နည်းပါးသည်။ ထို့ကြောင့် ကလေးများကို မိခင်နို့တိုက်ကျွေးခြင်းဖြင့် မိခင်များသည် ၎င်းတို့၏ကလေးများ၏ ဘဝတစ်သက်တာကျန်းမာရေးနှင့် ကျန်းမာရေးအတွက် ခိုင်မာသောအခြေခံအုတ်မြစ်ကို ချပေးနိုင်ပါသည်။

• ၁) ကလေးကို နို့တိုက်ကျွေးရာတွင် သက်သောင့်သက်သာဖြစ်စေပြီး ထိထိရောက်ရောက် တိုက်ကျွေးနိုင်ရန် အနေအထားနှင့် နည်းလမ်းများ။
• ၂) ကလေးဆာလောင်မှုဆိုင်ရာအချက်ပြများကို နားလည်ပြီး ကလေးဆာသောအချိန်တိုင်း နို့ချိုတိုက်ကျွေးခြင်း။
• ၃) နို့သီးခေါင်းများနာကျင်ခြင်းနှင့် နို့တင်းခြင်း၊ နို့ချောင်းပိတ်ခြင်း စသည့် စိန်ခေါ်မှု အခက်အခဲများကို ကျော်လွှားခြင်း။

မိခင်နို့တိုက်ကျွေးခြင်းစတင်တိုက်ကျွေးချိန်တွင် မိခင်ရောကလေးအတွက်ပါ သက်တောင့်သက်သာရှိပြီး ထိရောက်သော နို့တိုက်ကျွေးမှုဖြစ်စေရန် သင့်လျော်သောအနေအထားဖြင့် တိုက်ကျွေးခြင်းနှင့် မှန်ကန်သည့် နို့တိုက်ကျွေးနည်းလမ်းများကို ပြုလုပ်နိုင်ရန် လိုအပ်သည်။ သို့မှသာ မိခင်ကို နို့သီးခေါင်းကွဲအက်ခြင်း ၊ အနာဖြစ်ခြင်းများမှ ကာကွယ်ပေးမည့်အပြင် ကလေးအတွက်လည်း နို့လုံလုံလောက်လောက် ရရှိမည်ဖြစ်သည်။ သင့်တော်သော အနေအထားရရှိစေရန် မိခင်သည် သက်သောင့်သက်သာ ထိုင်၍သော်လည်းကောင်း၊ ဘေးတိုက် လှဲလျောင်း၍ သော်လည်းကောင်း ဆောင်ရွက်နိုင်သည်။ ကလေးကို မိခင်နှင့် နီးကပ်စွာ ပွေ့ချီပြီး ကလေး၏ ဦးခေါင်း နှင့် ခန္ဓာကိုယ်ကို တစ်ဖြောင့်တည်း ဖြစ်အောင် ထားပါ။ အနေအထားမှန်ကန်ပါက ကလေးသည် မိခင်၏ နို့သီးခေါင်းကို မှန်မှန်ကန်ကန် ထိကပ်၍ ငုံထားနိုင်မည် ဖြစ်သည်။ ကလေး၏ပါးစပ်နှင့် မိခင်၏ သားမြတ်ထိကပ်မှု မှန်ကန်ခြင်းကို ကလေး၏ ပါးစပ်ကျယ်နေခြင်း၊ အောက်နှုတ်ခမ်းလန်နေခြင်း၊ ကလေး၏မေးစေ့နှင့် မိခင်၏ သားမြတ်တို့ ထိကပ်နေခြင်း၊ ကလေးသည် မိခင်၏ နို့သီးခေါင်းတစ်ဝိုက် အမဲကွင်းတစ်ခုလုံး (သို့) အတော်များများကို ငုံထားခြင်း စသည့် အနေအထားများဖြင့် ဆန်းစစ်နိုင်သည်။ ထိုအခြေအနေမျိုးတွင် ကလေးငယ်သည် နို့ကို သက်သောင့်သက်သာ စို့ယူခြင်း၊ မျိုချခြင်း ကို တစ်လှည့်စီ ဆောင်ရွက်နေသည်ကို တွေ့ရမည် ဖြစ်ပြီး ကျေနပ်နေသည်ကို ခံစားရမည်ဖြစ်သည်။ မိခင်အနေဖြင့်လည်း နို့သီးခေါင်းတွင် နာကျင်ခြင်းမျိုးကို မခံစားရပဲ ကလေးမှ နို့များကို ကောင်းမွန်စွာ စို့ယူသွားသောကြောင့် နို့တင်းခြင်း၊ နို့ချောင်းပိတ်ခြင်းစသည့် ဝေဒနာများမှလည်း သက်သာစေပါသည်။

ကလေးဆာလောင်မှုဆိုင်ရာအချက်ပြမှုများကို နားလည်ပြီး နို့ချိုတိုက်ကျွေးခြင်းသည် မိခင်နို့တိုက်ကျွေးခြင်း၏ အခြေခံအချက်များဖြစ်သည်။ ကလေးငယ်များသည် ပါးစပ်ကိုဟ၍ အစာတောင်းသည့်ပုံပြုလုပ်ခြင်း၊ နှုတ်ခမ်းကို နို့စို့သည့်ပုံပြုလုပ်ခြင်း၊ လက်ကို ပါးစပ်နားတေ့ခြင်း၊ စုပ်ခြင်း နှင့် (အလွန်ဆာနေပါက) ဂျီကျခြင်း၊ အလိုမကျဖြစ်ခြင်းစသည့် သိမ်မွေ့သောအချက်ပြမှုများမှတစ်ဆင့် ၎င်းတို့၏ ဆာလောင်မှုကို ပြသလေ့ရှိသည်။ ဤအချက်များကို နားလည်ပြီး ချက်ခြင်းတုံ့ပြန်ခြင်းသည် မိခင်နှင့်ကလေးကြား ဆက်ဆံရေးကို မြှင့်တင်ပေးပြီး ကလေး၏အာဟာရလိုအပ်ချက်ကို ကောင်းမွန်စွာ ဖြည့်ဆည်းပေးသည်။ ကလေးကို အချိန်ဇယား တင်းတင်းကြပ်ကြပ်ထား၍ နို့တိုက်ခြင်းထက် ၎င်းတို့၏ တောင်းဆိုချက်ပေါ်မူတည်၍ မကြာခဏ တိုက်ကျွေးခြင်းက ပို၍ကောင်းသည်။ သို့မှသာ ၎င်းတို့၏တစ်ဦးချင်းစီ၏ လိုအပ်ချက်အရ အာဟာရကို ထိန်းညှိပေးနိုင်ပြီး ကိုယ်အလေးချိန်တိုးလာစေနိုင်သည်။ မိခင်နို့ထွက်ခြင်းကိုလည်း အားပေးသည်။

မိခင်နို့တိုက်ကျွေးရာတွင် နို့သီးခေါင်းနာခြင်းနှင့် နို့တင်းခြင်း/နို့ချောင်းပိတ်ခြင်း စသည့် ပြဿနာများ ကြုံတွေ့ရလေ့ရှိပြီး မှန်ကန်စွာ ကိုင်တွယ်နိုင်ရန် အရေးကြီးသည်။ ထိုဖြစ်စဉ်များသည် မိခင်နို့တိုက်ကျွေးသည့် အစောပိုင်းကာလများတွင် အဖြစ်များပြီး ကလေးနို့တိုက်ပုံမမှန်ကန်ခြင်း သို့မဟုတ် ထိခိုက်လွယ်သော အရေပြားကြောင့် ဖြစ်နိုင်သည်။ ထိုဖြစ်စဉ်ကို ရှောင်ရှားနိုင်ရန် နို့တိုက်သည့်အနေအထားမှန်ကန်အောင်ထားရှိခြင်း ၊ ကလေးနို့စို့သည့်အခါ နို့သီးခေါင်းကိုသာမငုံစေဘဲ နို့ပတ်လည်အမဲကွင်းတစ်ခုလုံး (သို့) အတော်များများကို သေချာစွာငုံစေခြင်း၊  lanolin ခရင်မ်  အသုံးပြုခြင်း သို့မဟုတ် နို့ရည်အနည်းငယ်ကိုနို့တိုက်ခါနီးညှစ်ထုတ်၍ နို့သီးခေါင်းကို စိုစေခြင်း၊  နို့မတိုက်မီစပ်ကြား အချိန်တွင် နို့သီးခေါင်းကို လေသလပ်ခံခြင်း (ပွချောင်သော အတွင်းခံ/အင်္ကျီဝတ်ဆင်နိုင်ပါသည်) စသည်တို့ ဆောင်ရွက်နိုင်သည်။ မိခင်၏ နို့ထွက်လမ်းကြောင်းများတွင် နို့အလွန်အကျွံပြည့်လာသောအခါ နို့တင်းလာပြီး မအီမသာခံစားရနိုင်သည်။  နို့တင်းခြင်း/နို့ချောင်းပိတ်ခြင်းကို ရှောင်ရှားနိုင်ရန် ကလေးကို မကြာခဏ နို့တိုက်ပေးခြင်း၊ အနွေးအိတ်ကပ်ခြင်း၊ နို့ကိုညှစ်ထုတ်ပစ်ခြင်း စသည်တို့ဆောင်ရွက်နိုင်သည်။

• နို့တိုက်နေစဉ် ကျန်းမာရေးနှင့်ညီညွတ်စွာ စားသုံးခြင်း။
• နို့တိုက်မိခင်များအတွက် အာဟာရလိုအပ်ချက်များ။
• အလုပ်ပြန်လုပ်သည့်အခါ (သို့) ကျောင်းပြန်တက်ရသည့်အခါ မိခင်နို့တိုက်ကျွေးခြင်းကို စီမံခန့်ခွဲရန် အကြံပြုချက်များ

မိခင်နို့တိုက်ကျွေးစဉ်တွင် ကျန်းမာရေးနှင့်ညီညွတ်သည့် အစားအသောက်ကို စားသုံးပေးမှသာ မိခင်၏ကျန်းမာရေးကောင်းမွန်သည့်အပြင် မိခင်နို့၏အရည်အသွေးကိုလည်း ကောင်းမွန်မည် ဖြစ်ပါသည်။ နို့တိုက်မိခင်များသည် သစ်သီးများ၊ ဟင်းသီးဟင်းရွက်များ၊ အစေ့အဆန်များ၊ အသားငါးမှရရှိသော ပရိုတင်းဓါတ်နှင့် ကျန်းမာသောအဆီများအပါအဝင် အစားအစာအုပ်စုအားလုံးပါဝင်အောင် စားသုံးပေးသင့်သည်။ နို့တိုက်မိခင်များသည် ရေဓါတ်ပြည့်ဝရန် လိုအပ်သောကြောင့် ရေ၊ နို့အမျိုးမျိုး နှင့် အသီးဖျော်ရည် စသည်တို့ကို သောက်သုံးပေးသင့်သည်။ နို့တိုက်မိခင်များသည် ပုံမှန်အားဖြင့် အစားရှောင်ရန် မလိုအပ်ပါ။ မိခင်တစ်ဦးချင်းစီနှင့် ကလေးအတွက် အကောင်းမွန်ဆုံးအာဟာရဓါတ်ရရှိစေရန် ကျန်းမာရေးစောင့်ရှောက်မှုပေးသူ (သို့) အာဟာရပညာရှင်များဖြင့်လည်း ဆွေးနွေးတိုင်ပင်နိုင်သည်။

နို့တိုက်မိခင်များသည် ၎င်းတို့၏ကလေးအား ပြုစုစောင့်ရှောက်ရန် လိုအပ်သော စွမ်းအင်နှင့် အာဟာရဓာတ်များရရှိစေရန်အတွက် ၎င်းတို့၏ကိုယ်ပိုင်အာဟာရကို ဦးစားပေးရန် အလွန်အရေးကြီးသည်။ နို့တိုက်မိခင်များသည် မိမိတို့ခန္ဓာကိုယ်ကို ပုံမှန်လည်ပတ်စေနိုင်ရန် စွမ်းအင်ရရှိစေရန်၊ စံနှုန်းပြည့်မီသော မိခင်နို့ဖြစ်စေရန် နှင့် နို့ထွက်နှုန်းကောင်းစေရန်၊ အတွက်ကယ်လိုရီများပို၍ လိုအပ်သည်။ နို့တိုက်မိခင်များအတွက် လိုအပ်သော အဓိကအာဟာရဓာတ်များတွင် ပရိုတင်း၊ ကယ်လ်စီယမ်၊ သံဓာတ်၊ အိုမီဂါ-၃ ဖက်တီးအက်ဆစ်၊ဗီတာမင် D နှင့် ဖောလစ်အက်စစ်တို့ ပါဝင်သည်။ ပရိုတင်းဓာတ်သည် မိခင်နှင့်ကလေးနှစ်ဦးလုံးအတွက် ခန္ဓာကိုယ်ကြီးထွားခြင်းနှင့် တစ်ရှူးများ ပြုပြင်ခြင်းတွင် မရှိမဖြစ်လိုအပ်ပြီး ကယ်လ်စီယမ်သည် အရိုးများကို သန်မာအောင် ဆောင်ရွက်ပေးသည်။ သံဓာတ်သည် သွေးအားနည်းရောဂါကို ကာကွယ်ရန်အတွက် အရေးကြီးပြီး အိုမီဂါ-၃ ဖက်တီးအက်ဆစ်သည် ကလေးငယ်၏ ဦးနှောက်ဖွံ့ဖြိုးမှုကို ထောက်ပံ့ပေးသည်။ ဗီတာမင် D သည် အရိုးကျန်းမာရေးနှင့် ကိုယ်ခံအားစနစ်အတွက် အရေးပါပြီး ဖောလစ်အက်စစ်သည် ဆဲလ်များကြီးထွားမှုနှင့် ဖွံ့ဖြိုးမှုအတွက် အရေးကြီးသည်။ ထိုအာဟာရများကို စုံလင်စွာရရှိနိုင်ရန် နို့တိုက်မိခင်များသည် အာဟာရဓာတ်ကြွယ်ဝသော အစားအစာမျိုးစုံပါဝင်သော မျှတသောအစားအစာကို စားသုံးပေးနိုင်ပြီး လိုအပ်ပါက ဖြည့်စွက်အာဟာရများ (ဥပမာ – မိခင်အတွက်ဗီတာမင်ဆေးများ) ဖြင့် ဖြည့်စွက်ပေးနိုင်သည်။

နို့တိုက်နေစဉ် အလုပ်ပြန်လုပ်ရသည့်အခါ (သို့) ကျောင်းပြန်တက်ရသည့်အခါ မိခင်နို့ကို ဆက်လက်တိုက်ကျွေးရန် စိန်ခေါ်မှုများကို မိခင်များ အမြဲကြုံတွေ့ရလေ့ရှိသည်။ ထိုအခြေအနေများကို ကိုင်တွယ်ဖြေရှင်းနိုင်ရန်အတွက် အောက်ပါအကြံပြုချက်များကို အသုံးချနိုင်ပါသည်။

• အလုပ်ရှင်များ သို့မဟုတ် ဆရာများနှင့် ဆက်သွယ်ပါ- နို့ညှစ်ထုတ်ရန်အတွက်အချိန်ညှိနှိုင်းခြင်း နှင့်နို့ညှစ်ရန် နေရာပြင်ဆင်ခြင်း စသည့်အရာများအတွက် ညှိနှိုင်းဆွေးနွေးကြည့်ပါ။ ကလေးကိုမိခင်နှင့်အတူ ခေါ်သွားနိုင်သည့် လုပ်ငန်းခွင်/ကျောင်းဖြစ်ပါက မိခင်နို့ကို သက်တောင့်သက်သာ တိုက်ကျွေးနိုင်မည့်အချိန်နှင့် နေရာကို ညှိနှိုင်းဆွေးနွေးပါ။

• နို့ညှစ်သည့်အချိန်ကို သတ်သတ်မှတ်မှတ်ထားပါ-နို့ပုံမှန်ထွက်စေရန်နှင့် နို့တင်းခြင်း၊နို့ချောင်းပိတ်ခြင်းကို ကာကွယ်နိုင်ရန် နို့ကိုပုံမှန်ညှစ်ထုတ်ရန် စီစဉ်ပါ။ အရည်အသွေးကောင်းသော နို့ညှစ်စက်/ပစ္စည်း နှင့် နို့သိမ်းရန်အိတ် (သို့) ခွက်များကို အသုံးပြု၍ နို့ရည်ကို ညှစ်ပြီး ထိန်းသိမ်းနိုင်သည်။

• ရေခဲသေတ္တာထဲ နို့သိမ်းနိုင်ရန် စီစဉ်ပါ- မိခင်နို့ကို တိုက်ရိုက်တိုက်ကျွေးခြင်း မပြုနိုင်သည့်အခါ အလုပ်မသွားမီ/ကျောင်းမသွားမီ နို့ကို ညှစ်၍ ရေခဲသေတ္တာထဲတွင် ထည့်သွင်းသိုလှောင်ကာ တိုက်ကျွေးနိုင်ရန် စတင် စီစဉ်ပါ။

• အစီအစဉ်တကျဆောင်ရွက်ပါ- နို့တိုက်ချိန်နှင့် နို့ညှစ်ချိန်များကြား လွယ်ကူအဆင်ပြေစေရန် နို့ညှစ်ရမည့်အချိန်သတ်မှတ်ခြင်း၊ နို့ကိုသိမ်းဆည်းခြင်း နှင့် နို့ညှစ်စက်နှင့် ဆက်စပ်ပစ္စည်းများကိုထိန်းသိမ်းခြင်း စသည့်လုပ်ငန်းစဉ်များကို သေချာစီစဉ်ထားပြီး ဆောင်ရွက်ပါ။

• အကူအညီရယူပါ- လုပ်ငန်းခွင်ဝင်နေပြီး (သို့) ကျောင်းတက်နေပြီး မိခင်နို့ကို အောင်အောင်မြင်မြင် ဆက်လက်တိုက်ကျွေးနေသော အခြားနို့တိုက်မိခင်များထံမှ လမ်းညွှန်မှု၊ အားပေးမှုနှင့် အကြံဉာဏ်များရယူပါ။ မိခင်နို့တိုက်ကျွေးနိုင်ရန် ဆွေးနွေးပေးသည့် အထောက်အကူပြုအဖွဲ့များသို့မဟုတ် အွန်လိုင်းအသိုင်းအဝိုင်းများတွင် ပါဝင်ပါ။

• မိမိကိုယ်ကို ဦးစားပေးပါ- စိတ်ဖိစီးမှုကို လျှော့ချရန်နှင့် မိခင်၏ကိုယ်ကျန်းမာရေး၊ စိတ်ကျန်းမာရေးကို.မြှင့်တင်ရန် မိမိကိုယ်ကို ဂရုစိုက်နိုင်ရန် အချိန်ယူပါ။ မိမိနှစ်သက်သော အပန်းဖြေနည်းလမ်းများ အားဖြင့်သော်လည်းကောင်း၊ စိတ်တည်ငြိမ်အေးချမ်းစေရန် တရားထိုင်ခြင်းများပြုလုပ်ခြင်းဖြင့် သော်လည်းကောင်း မိမိကိုယ်ကို အပန်းပြေအောင် ဆောင်ရွက်နိုင်သည်။

• လမစေ့ပဲမွေးသော ကလေးများကို နို့တိုက်ခြင်း (သို့) အထူးဂရုစိုက်စောင့်ရှောက်မှု လိုအပ်သော ကလေးများကို နို့တိုက်ခြင်း။
• အမွှာကလေးများကို နို့တိုက်ခြင်း (နှစ်မွှာပူး၊ သုံးမွှာပူး အစရှိသဖြင့်)။
• ကလေးခွဲမွေးပြီးနောက် (သို့) အခြားသော ဆေးကုသမှုများကို ခံယူပြီးနောက် ကလေးနို့တိုက်ခြင်း။

လမစေ့ဘဲ မွေးသော ကလေးငယ်များနှင့် အထူးဂရုစိုက်စောင့်ရှောက်မှု လိုအပ်သော ကလေးများကို နို့တိုက်ရာတွင် ၎င်းတို့၏ အာဟာရလိုအပ်ချက် နှင့် ကြီးထွားရန်အတွက် လိုအပ်ချက်များကို အလေးထား စဉ်းစားရမည်။ ကိုယ်ဝန် ၃၇ ပတ် မပြည့်မီ မွေးဖွားသည့် လမစေ့သည့် ကလေးများသည် နို့စို့နိုင်ရန်ကောင်းစွာ မဖွံ့ဖြိုးသေးခြင်း၊ နို့သီးခေါင်းကို ကောင်းစွာမငုံနိုင်သေးခြင်း၊ နှင့် စွမ်းအင်များကို လုံလောက်အောင် မသိုလှောင်နိုင်ခြင်း စသည့် အခက်အခဲများ တွေ့ကြုံရလေ့ရှိသည်။ လမစေ့ဘဲမွေးသော မွေးကင်းစကလေးငယ်များကို နို့တိုက်ရာတွင် နို့ရည်ကို ဆေးထိုးပြွန် (သို့) Pump စသည့်အရာများဖြင့် တိုက်ကျွေးနိုင်သည်။ မွေးစကလေးငယ်ကို သားပိုက်ကောင်ကဲ့သို့ စောင့်ရှောက်နည်း (Kangaroo care) ဖြင့် မိခင်နှင့် ကလေး၏အရေပြားအချင်းချင်း ထိတွေ့စေကာ စောင့်ရှောက်နိုင်သည်။ ထိုနည်းလမ်းသည် မိခင်နှင့် ကလေးအကြား ဆက်သွယ်မှုမေတ္တာကို တိုးပွားစေသည့်အပြင် ကလေး၏ အပူချိန်ကို ညှိပေးစေနိုင်ခြင်း၊ ကလေးအသက်ရှူခြင်းကို မှန်စေခြင်း စသည့် အကျိုးကျေးဇူးများကို ရရှိစေနိုင်သည်။  ကလေးငယ်များကြီးထွားသန်မာလာသည်နှင့်အမျှ ကျန်းမာရေးစောင့်ရှောက်သူ နှင့် မိခင်နို့တိုက်ကျွေးရေးအတိုင်ပင်ခံ (ရှိပါက) တို့၏ အကူအညီ ရယူကာ မိခင်နို့ကို တိုက်ရိုက်တိုက်ကျွေးနိုင်သည်။ အထူးဂရုစိုက်စောင့်ရှောက်ရန် လိုအပ်သော မွေးရာပါ နှုတ်ခမ်းကွဲ သို့မဟုတ် အာခေါင်ကွဲပါရှိသော ကလေးများကို မိခင်နို့တိုက်ကျွေးရာတွင် လွယ်ကူချောမွေ့စေရန် အထူးပြုလုပ်ထားသောနို့ဘူးများ သို့မဟုတ် နို့သီးခေါင်းအကာများကဲ့သို့သော အထူးနို့တိုက်ကျွေးရန် နည်းပညာနှင့် ပစ္စည်းများ လိုအပ်နိုင်သည်။ စိတ်ရှည်ခြင်း၊ လိုအပ်သော အကူအညီရယူခြင်း နှင့် ကျန်းမာရေး စောင့်ရှောက်မှုပေးသူများထံမှ လမ်းညွှန်ချက် ခံယူခြင်းအားဖြင့် မိခင်များသည် ကလေးများကို အောင်မြင်စွာ နို့တိုက်ကျွေးနိုင်ပြီး ကလေးငယ်အတွက်ကြီးထွားမှုအတွက် လိုအပ်သော အာဟာရဓါတ်၊ ခုခံအားနှင့်ဆိုင်သော ပဋိပစ္စည်းများ နှင့် စိတ်လုံခြုံနွေးထွေးများကို ဖြည့်စွမ်းပေးနိုင်ပေမည်။

အမွှာကလေးများကို နို့တိုက်ရာတွင် မိခင်နှင့် ကလေးများအတွက် စိန်ခေါ်မှုများစွာ တွေ့ကြုံရနိုင်သည်။ အမွှာကလေးများကို စနစ်တကျ အောင်မြင်စွာ မိခင်နို့တိုက်ကျွေးနိုင်ရန် သေချာစွာစီစဉ်ခြင်း၊ စနစ်တကျဆောင်ရွက်ခြင်းနှင့် အခြားသူများထံမှ အကူအညီရယူခြင်းများ လိုအပ်သည်။ အမွှာကလေးမွေးထားသောမိခင်သည် ကလေးငယ်များကို တစ်ဆက်တည်း (သို့) တစ်လှည့်စီ နို့တိုက်ကျွေးခြင်း လိုအပ်နိုင်သည်။ ထို့ကြောင့် ကလေးငယ်များကို နို့တိုက်ကျွေးရာတွင် ကလေးများကို အနေအထားမှန်ကန်စွာဖြင့် နို့တိုက်ကျွေးနိုင်ရန် လိုအပ်သည်။ ကလေးနှစ်ယောက်ကို နို့တစ်ပြိုင်နက် တိုက်ကျွေးရမည်ဆိုပါက မိခင်ဖြစ်သူက ထိုင်လျှက် လက်မောင်းနှစ်ဖက်လုံးအသုံးပြုပြီး ဘောလုံးနှစ်လုံးကို တစ်ပြိုင်နက်ပိုက်ထားသကဲ့သို့ မိခင်၏ခန္ဓာကိုယ်ဘေးတစ်ဖက်တစ်ချက်တွင် ကလေး၏ကိုယ်များကို ပိုက်ထွေးထားပြီး ကလေးများကို ခေါင်းချင်းဆိုင်ကာ နို့တိုက်ကျွေးသည့် (Football hold)  (သို့) ကလေးနှစ်ယောက်လုံးကို တစ်ဖက်တည်း လှဲလျောင်းစေကာ ထွေးပွေ့ထားပြီး တိုက်ကျွေးသည့် အနေအထား (Double clutch) များသည် မိခင်ကော ကလေးပါ သက်တောင့်သက်သာ ဖြစ်စေနိုင်သည်။ မိခင်များသည် မိခင်နို့ကို တိုက်ရိုက်တိုက်ကျွေးနိုင်ရန် မဖြစ်နိုင်သည့်အခါ တိုက်ကျွေးနိုင်ရန် နို့ကိုညှစ်၍ သိမ်းထားနိုင်သည်။ (နို့တိုက်ခြင်းနှင့် နို့ကိုညှစ်ထုတ်ခြင်းကဏ္ဍတွင်ကြည့်ပါ) လက်တွဲဖော်၊ မိသားစုနှင့် ကျန်းမာရေးစောင့်ရှောက်မှုပေးသူများ၏ ပံ့ပိုးကူညီမှု၊ အားပေးမှုများနှင့် မိခင်နို့တိုက်ကျွေးရေးအတိုင်ပင်ခံ (ရှိပါက) (သို့) အမွှာနို့တိုက်မိခင်များအတွက် စုဖွဲ့ထားသော အဖွဲ့များမှ အကြံဉာဏ်နှင့် အတွေ့အကြုံများသည် နို့တိုက်မိခင်များအတွက် တန်ဖိုးရှိသော လမ်းညွှန်မှုများနှင့် အောင်အောင်မြင်မြင် နို့တိုက်ကျွေးနိုင်ရန် အထောက်အကူများစွာ ရရှိစေနိုင်သည်။ အမွှာကလေးများကို နို့တိုက်ကျွေးရာတွင် အခက်အခဲများ ကြုံတွေ့နိုင်ရသော်လည်း ရေရှည်တွင် မိခင်နှင့် ကလေးကြား ဆက်သွယ်မှုကောင်းလာစေခြင်း၊ နို့ဘူးတိုက်ခြင်းကြောင့် ကုန်ကျလာနိုင်သော ကုန်ကျစရိတ်ကို လျှော့ချနိုင်ခြင်း နှင့် ကျန်းမာရေး အကျိုးကျေးဇူးများ စသည့် မိခင်နှင့် ကလေးနှစ်ဖက်လုံးအတွက် အကျိုးကျေးဇူးမြောက်များစွာ ခံစားရရှိနိုင်သည်။

ကလေးခွဲမွေးထားသည့် မိခင်များသည် ခွဲစိတ်ပြီးကာစအချိန်တွင် နို့ချက်ချင်းမထွက်ခြင်း၊ လှုပ်ရှားရန် မလွယ်ကူခြင်း နှင့် သက်သောင့်သက်သာ မရှိခြင်း စသည်တို့ကို တွေ့ကြုံရနိုင်သည်။ ထို့ကြောင့် ထိုအခြေအနေမျိုးကို ကျော်ဖြတ်နိုင်ရန် အကူအညီ အထောက်အပံ့များ လိုအပ်သည်။ နို့တိုက်ကျွေးရန် အနေအထား ပြင်ဆင်ရာတွင် ဘေးတိုက်လှဲလျောင်းနေသည့် အနေအထား သို့မဟုတ် ခေါင်းအုံးများခု၍ ဘေးတိုက်နို့တိုက်ခြင်း စသည်တို့သည် မိခင်နို့ကို သက်တောင့်သက်သာတိုက်ကျွေးနိုင်ရန် ကူညီပေးနိုင်သည်။ မိခင်နှင့် ကလေးကို အရေပြားချင်း ထိတွေ့စေခြင်းအားဖြင့် မိခင်နို့ထွက်လာစေရန် လှုံ့ဆော်ပေးနိုင်သည့် အပြင် မိခင်နှင့် ကလေးကြား ဆက်သွယ်မှုကိုလည်း တိုးစေနိုင်သည်။ တစ်ခါတစ်ရံ မေ့ဆေး (သို့) အခြားဆေးဝါးကုသမှုများကြောင့် မိခင်နို့တိုက်ကျွေးခြင်းကို ထိခိုက်လာနိုင်သည့်အချိန်မျိုးတွင် မိခင်များသည် နို့တိုက်ကျွေးမှုအတွက် အခြားရွေးချယ်စရာများကို ရွေးချယ်နိုင်သည် သို့မဟုတ် မိခင်နို့နှင့်အတူ ဖြည့်စွက်တိုက်ကျွေးနိုင်မည့် နည်းလမ်းကို ရှာဖွေနိုင်သည်။ ကျန်းမာရေးစောင့်ရှောက်မှုပေးသူများနှင့် အလုပ်တွဲလုပ်နိုင်ပါသည်။ ခွဲစိတ်ပြီးနောက် (သို့) ဆေးကုသမှု ခံယူပြီးနောက် မိခင်နို့တိုက်ကျွေးခြင်းသည် စိန်ခေါ်မှုများစွာ ရှိသော်လည်း  မိခင်နှင့် ကလေးအကြား ဆက်သွယ်မှု ပိုကောင်းလာစေခြင်း၊ ကိုယ်ခံစွမ်းအားကောင်းလာစေခြင်း နှင့် စိတ်ပိုင်းဆိုင်ရာ ကျန်းမာခြင်း စသည့် အကျိုးကျေးဇူးများစွာရရှိစေနိုင်သည်။ ထို့ကြောင့် ခွဲစိတ်ပြီးစမိခင်များ (သို့) ဆေးကုသမှု ခံယူထားသော မိခင်များသည် မိခင်နို့ကောင်းမွန်စွာ တိုက်ကျွေးနိုင်စေရန်အတွက် မိခင်ကိုယ်တိုင်စိတ်ရှည်စွာ လေ့ကျင့်ပြီး ကျန်းမာရေးစောင့်ရှောက်မှုပေးသူ၏ အကြံဉာဏ်များကို လိုက်နာရမည်ဖြစ်ပြီး မိသားစုမှလည်း ထိုမိခင်ကို လိုအပ်သောအကူအညီနှင့် အထောက်အပံ့များပေးသင့်သည်။ သို့မှသာ ကလေးကို လုံလောက်သော အာဟာရဓါတ်ရရှိစေကာ ပုံမှန်အတိုင်းကြီးထွားဖွံ့ဖြိုးလာအောင် ပြုစုစောင့်ရှောက်နိုင်ပေမည်။

• နို့ညှစ်စက်များနှင့် ၎င်းတို့ကိုအသုံးပြုခြင်းမိတ်ဆက်။
• နို့ကိုပုံမှန်ညှစ်ထုတ်နိုင်ရန် ပြင်ဆင်ဆောင်ရွက်ခြင်း။
• မိခင်နို့ကို လုံခြုံစွာ သိမ်းဆည်းခြင်းနှင့် ကိုင်တွယ်ခြင်း။

နို့ညှစ်စက်များသည် အကြောင်းအမျိုးမျိုးကြောင့် မိခင်နို့ကိုတိုက်ရိုက်တိုက်ကျွေးရန် အဆင်မပြေသည့်မိခင်များအတွက် အလွန်အသုံးဝင်သော ပစ္စည်းဖြစ်သည်။ မိခင်နို့ကို ညှစ်ထုတ်ခြင်းသည် နို့ကို ညှစ်၍ လိုအပ်သည့်အခါတိုက်ကျွေးနိုင်ရန် သိုလှောင်ထားနိုင်ရုံမျှမက နို့ထွက်များစေရန် လှုံ့ဆော်ပေးခြင်း၊ နို့တင်းခြင်း/နို့ချောင်းပိတ်ခြင်းကို သက်သာစေခြင်း စသည့် အကျိုးကျေးဇူးများလည်း ရရှိနိုင်သည်။ လက်ဖြင့်အသုံးပြုရသော နို့ညှစ်စက်နှင့် လျှပ်စစ်ဖြင့်အသုံးပြုနိုင်သော နို့ညှစ်စက်ဟူ၍ နို့ညှစ်စက် ၂ မျိုးရှိသည်။ လက်ဖြင့်အသုံးပြုရသော နို့ညှစ်စက်သည် တစ်ခါတစ်ရံအသုံးပြုရန် သို့မဟုတ် သွားရင်းလာရင်း အသုံးပြုရန် သင့်တော်သည်။  လျှပ်စစ်ဖြင့်အသုံးပြုနိုင်သော နို့ညှစ်စက်သည် လျှပ်စစ်ဓာတ်အား သို့မဟုတ် ဘက်ထရီများအားဖြင့် အသုံးပြုနိုင်ပြီး  ပိုမိုထိရောက်၍ သက်သောင့်သက်သာဖြစ်စေရန် စက်၏စုပ်အားကို လိုအပ်ချက်အပေါ်မူတည်၍ ချိန်ညှိနိုင်သည်။ မတူညီသော ရင်သားပုံသဏ္ဍာန်နှင့် အရွယ်အစားများကို လိုက်လျောညီထွေဖြစ်အောင် နို့ညှစ်စက်များကို ရွေးချယ်ဝယ်ယူနိုင်သည်။ ရင်သားစုပ်စက်ကို အသုံးပြုရာတွင် စုပ်ခွက်ကို မိခင်၏ နို့သီးခေါင်းနှင့် နို့သီးခေါင်းတစ်ဝိုက် အမဲကွင်းတစ်ခုလုံးကို ငုံစေပြီးမှ စက်ကိုဖွင့်ကာ စုပ်အားကို မိမိနှင့် အဆင်ပြေသည်အထိ ချိန်ညှိရမည်။ သန့်ရှင်းမှုရှိပြီး ညှစ်ထားသောနို့ကို မညစ်ညမ်းစေရန် နို့ညှစ်စက်ကို သေချာစွာဆေးကြောထိန်းသိမ်းရန် အလွန်အရေးကြီးသည်။

အလုပ်ပြန်ဝင်ရချိန် သို့မဟုတ် ကလေးနှင့်ခွဲခွာနေချိန်၌ နို့တိုက်ကျွေးရန်လိုအပ်သည့် မိခင်များအတွက်နှင့် နို့မှန်မှန်တိုက်ရန် လိုအပ်သော နို့တိုက်မိခင်များအတွက် နို့ကိုပုံမှန်ညှစ်ထုတ်ရန် လိုအပ်သည်။ ကလေး၏ ပုံမှန်နို့တောင်းလေ့ရှိသော အချိန်ကို လိုက်လျောညီထွေဖြစ်အောင် နို့ညှစ်ထားခြင်းအားဖြင့် ကလေးအတွက် မိခင်နို့ကို အဆက်မပြတ် လုံလုံလောက်လောက် ရရှိစေနိုင်သည်။ ကလေးကို နို့တိုက်သည့် အကြိမ်ရေနှင့် တူစေရန် မိခင်များသည် ပုံမှန်အားဖြင့် နို့တိုက်ပြီးနောက် သို့မဟုတ် တစ်နေ့အတွင်း အချိန်ပုံမှန် သတ်မှတ်၍ ၈ ကြိမ်မှ ၁၂ ကြိမ် နို့ကိုညှစ်ထုတ်သင့်သည်။  နို့ညှစ်ရာတွင် သက်သောင့်သက်သာရှိပြီး အနှောင့်အယှက်နည်းသော နေရာကို ရွေးချယ်ရမည်။ မိခင်များသည် မိမိနှင့်ရင်သွေးအတွက် အကောင်းဆုံးအချိန်နှင့် နည်းလမ်းကို ရှာဖွေရန် အချိန်လိုအပ်နိုင်ပြီး စိတ်ရှည်ရှည်ထားကာ ဆောင်ရွက်ရမည်။ လုပ်ဖော်ကိုင်ဖက်များ၊ မိသားစုဝင်များနှင့် ကျန်းမာရေးစောင့်ရှောက်မှုပေးသူများ၏ ဖေးမကူညီမှုများသည် နို့တိုက်မိခင်များ၏ စိန်ခေါ်မှုများကို ကျော်ဖြတ်နိုင်ရန် ပံ့ပိုးပေးနိုင်ပါသည်။

မိခင်နို့ကို လုံခြုံစွာ သိမ်းဆည်း ကိုင်တွယ်ခြင်းသည် နို့၏ အရည်အသွေးကို ထိန်းသိမ်းရန်နှင့် ကလေးအတွက် ဘေးကင်းကြောင်း သေချာစေရန်အတွက် မရှိမဖြစ် လိုအပ်ပါသည်။ ညှစ်ထုတ်ထားသောမိခင်နို့ကို သန့်ရှင်းပြီး ပိုးသတ်ထားသော မိခင်နို့သိုလှောင်အိတ် သို့မဟုတ် BPA မပါသော ပုလင်းများတွင် ထည့်သွင်းကာ ရေခဲသေတ္တာအေးခန်း/ရေခဲခန်း သို့မဟုတ် အအေးခံအိတ်များတွင် သိမ်းဆည်း၍ အသုံးပြုနိုင်ပါသည်။ သိုလှောင်မှု အပူချိန်နှင့် အခြေအနေများပေါ်မူတည်၍ လတ်လတ်ဆတ်ဆတ် ညှစ်ထုတ်ထားသော မိခင်နို့ကို ရေခဲသေတ္တာအအေးခန်းထဲတွင် 4-5 ရက်အထိ သိမ်းဆည်းနိုင်ပြီး ရေခဲခန်းထဲတွင် 6-12 လအထိ သိမ်းဆည်းနိုင်ပါသည်။ နို့မညှစ်မှီနှင့် နို့ကိုကိုင်တွယ်ခြင်းမပြုမီ လက်ကို ဆပ်ပြာနှင့်ရေ အသုံးပြု၍ သေချာဆေးကြောသင့်သည်။ နို့ကိုသိုလှောင်သိမ်းဆည်းရန် အိတ်၊ခွက်များကိုလည်း သန့်ရှင်းပိုးသတ်ပြီးမှ အသုံးပြုရမည်ဖြစ်ပြီး မသိမ်းဆည်းမှီ နို့ညှစ်ထုတ်ထားသည့်ရက်နှင့် အချိန်ကို အညွှန်းတပ်ထားရမည်။ ခဲထားသောမိခင်နို့ကို ရေခဲသေတ္တာအတွင်းတွင်ထားခြင်း သို့မဟုတ် ရေခပ်နွေးနွေးဖြင့်စိမ်ခြင်းအားဖြင့်သာ အရည်ပျော်အောင် ဆောင်ရွက်သင့်ပြီး မိုက်ခရိုဝေ့ဖြင့်နွေးခြင်း သို့မဟုတ် ဆူပွက်အောင် ကြိုချက်ခြင်း လုံးဝမလုပ်သင့်ပါ။ မိခင်နို့၏ ဘေးကင်းမှုနှင့် အရည်အသွေးကို သေချာစေရန် ညှစ်ထားသောနို့ကို သေချာစွာ ကိုင်တွယ်ထိန်းသိမ်းရမည်ဖြစ်ပြီး ထိုသို့ပြုလုပ်ခြင်းသည် မိခင်နို့တိုက်ရိုက်မတိုက်ကျွေးနိုင်သည့် အချိန်မျိုးတွင် ကလေးငယ်များအတွက် အာဟာရပြည့်ဝသောနို့ကို လုံလုံလောက်လောက်စဉ်ဆက်မပြတ် ရရှိစေနိုင်ရန် ကူညီပေးနိုင်သည်။

မိခင်များသည် ကလေးများကို မွေးပြီးစောနိုင်သမျှ စောလျှင်စွာ (ဖြစ်နိုင်ပါက တစ်နာရီအတွင်း) နို့တိုက်ရမည် ဖြစ်ပြီး မွေးပြီး ၆ လအထိ မိခင်နို့ (မိခင်နို့တိုက်ကျွေးရန် မဖြစ်နိုင်သော ကလေးများတွင် ဖော်မြူလာနို့) တစ်မျိုးတည်းကိုသာ တိုက်ကျွေးရမည်ဖြစ်သည်။ ကလေးအသက် ၆ လမှ စ၍ မိခင်နို့နှင့်အတူ ဖြည့်စွက် အာဟာရများကို တစ်ဖြေးဖြေး လေ့ကျင့်ကာ ကျွေးမွေးသွားရမည်။ မိခင်နို့ကို ကလေးအသက် ၂နှစ် (သို့) ထို့ထက်ကျော်လွန်၍ တိုက်ကျွေးသွားနိုင်သည်။ ဤကဏ္ဍတွင် ကလေးငယ်ကို နို့ဖြတ်ရမည့်အချိန်ကို သိရှိနိုင်ရန်နှင့်  ကြုံတွေ့နိုင်သည့် အခက်အခဲများကို ဖြေရှင်းနိုင်ရန် အကြောင်းအရာများကို ဖော်ပြထားပါသည်။

• ၁)နို့ဖြတ်ရန် အဆင်သင့်ဖြစ်နေသော ကလေး၏လက္ခဏာများ။
• ၂)နို့ကို တစ်ဖြည်းဖြည်း ဖြတ်သွားရန် နည်းလမ်းများ။
• ၃)နို့ဖြတ်နေစဉ်အတွင်း ဖြစ်ပေါ်တတ်သော ခံစားချက်များကို ရင်ဆိုင်ဖြေရှင်းခြင်း။

နို့ဖြတ်ရန်ပြင်ဆင်သည့်အခါ သင်၏ကလေးသည် နို့ဖြတ်ရန် အဆင်သင့်ဖြစ်ခြင်း ရှိ/မရှိ သိရှိရန် အလွန်ပင် အရေးပါသည်။ ကလေးနို့ဖြတ်ရမည့်အချိန်သည် ကလေး နှင့် မိသားစု တစ်ခုချင်းစီအပေါ်လိုက်၍ ကွဲပြားခြားနားနိုင်သော်လည်း ကလေးသည် နို့ဖြတ်ရန် အဆင်သင့်ဖြစ်/မဖြစ်ကို အောက်ပါအချက်များက ညွှန်ပြနိုင်သည်။

• မိခင်နို့တိုက်ကျွေးခြင်းအပေါ် စိတ်ဝင်စားမှု လျော့ကျသွားခြင်း- သင့်ကလေးသည် နို့တိုက်ချိန်တွင် စိတ်ဝင်စားမှု လျော့နည်းလာကာ နို့တိုက်နေစဉ်တွင် အလွယ်တကူ အာရုံပျံ့လွင့်လာခြင်း၊ သို့မဟုတ် နို့ကို တွန်းထုတ်ခြင်းတို့ ဖြစ်နိုင်သည်။
• ဝါးစားရသောအစားအစာ(Solid food) များပေါ်တွင်အာရုံစိုက်မှုတိုးလာခြင်း- ကလေး၏အာဟာရလိုအပ်ချက် မြှင့်လာသည်နှင့် အမျှ ကလေးများသည် စူးစမ်းလိုစိတ်ပြင်းပြလာပြီး အစားအစာကို တောင့်တလာကာ အစားအစာများကို လက်လှမ်းခြင်း သို့မဟုတ် အစာစားချိန်တွင် စိတ်လှုပ်ရှားခြင်း စသည့် အပြုအမူတို့ကို ပြသလာနိုင်သည်။
• နို့တိုက်ချိန်တစ်ချိန်နှင့်တစ်ချိန်ကြား ပို၍ခြားလာခြင်း- ကလေးသည် နို့မစို့ဘဲ ပို၍ကြာကြာနေလာနိုင်ပြီး နို့တိုက်ချိန်တစ်ချိန်နှင့် တစ်ချိန်ကြား ပို၍ကြာကြာ ခြားလာသည်။
• အလိုလိုနို့ပြတ်လာသည့်အပြုအမူများ- အချို့ကလေးများသည် သူတို့ကိုယ်တိုင်ပင် နို့သောက်သည့် အကြိမ်ရေတစ်ဖြည်းဖြည်းနည်းလာပြီး နို့တစ်ခါစို့လျှင်လည်း မကြာစေဘဲခဏသာစို့ခြင်း (သို့) နို့စို့ရန် စိတ်မဝင်စားတော့ခြင်း စသည့် နို့ပြတ်သည့် အပြုအမူများ ပြသလေ့ရှိကြသည်။
• မိခင်နို့အစားထိုးနို့များဖြင့်အဆင်ပြေခြင်း- ကလေးသည် နို့ဘူး (သို့) နို့ကိုခွက်ဖြင့်သောက်ခြင်း စသည့် မိခင်နို့အစားထိုးနို့များကို တင်းတိမ်ခြင်း နှင့် ကျေနပ်မှုရှိခြင်းအားဖြင့် နို့ဖြတ်ရန် အဆင်သင့် ဖြစ်နေကြောင်း သိရှိနိုင်သည်။

မိခင်နို့ကို ဖြတ်ခြင်းသည် မိခင်များအတွက် အကြီးမားဆုံး စိန်ခေါ်မှုများအနက်မှ တစ်ရပ်ဖြစ်သည်။ အောက်ပါတို့တွင် မိခင်နို့ကို ဖြည်းဖြည်းချင်းဖြတ်သွားနိုင်ရန် နည်းလမ်းများကို ဖော်ပြထားသည်။

• နို့တိုက်ချိန်များကို အခြားတစ်ခုဖြင့် အစားထိုးပါ- နို့တိုက်ချိန်တစ်ခုကို နို့ဘူးတိုက်ကျွေးခြင်း သို့မဟုတ် အစားအစာကျွေးခြင်းဖြင့် စတင်အစားထိုးပါ၊ ထိုနည်းလမ်းဖြင့် အချိန်ကြာလာသည်နှင့်အမျှ နို့တိုက်ချိန်ကို တဖြည်းဖြည်းလျှော့ချပါ။
• နို့တိုက်ချိန်ရန်ကြာချိန်ကိုလျှော့ချပါ- နို့တိုက်နေစဉ်အတွင်း ကလေးကို အာရုံလွှဲခြင်း (သို့) ကလေးနို့ဝသည့်အချိန်တွင် နို့တိုက်ခြင်းကိုညင်ညင်သာသာရပ်လိုက်ခြင်း စသည်တို့ကို ပြုလုပ်ခြင်းဖြင့် နို့တိုက်ရန်ကြာချိန်ကို တစ်ဖြည်းဖြည်း လျှော့ချပါ။
• ကလေးကို နှစ်သိမ့်ပေးပါ၊ အခြားအရာများကိုကမ်းလှမ်းပါ- နို့ဖြတ်ချိန်အတွင်း သင့်ကလေးအား ပွေ့ဖက်ပေးခြင်း၊ ချော့မြှူခြင်း ပြုလုပ်ပေး၍ ကလေးကိုနှစ်သိမ့်ပေးပြီး စိတ်လုံခြုံမှုရှိအောင် ပြုလုပ်ပေးပါ။ ကလေးနှစ်သက်သော အရုပ် သို့မဟုတ် ကလေးကြိုက်တတ်သော အရာများကို ပေး၍ ကလေးကို နှစ်သိမ့်ပေးနိုင်သည်။
• နို့အစားထိုးအစားအစာများ စတင်ပါ- မိခင်နို့တိုက်ကျွေးရမည့်အချိန်တွင် ကလေးကို နို့ဘူးတိုက်ကျွေးခြင်း၊ နို့ကိုခွက်ဖြင့်ဖျော်တိုက်ခြင်း၊ နို့ကိုဇွန်းဖြင့်တိုက်ခြင်း စသည့် အလေ့အကျင့်များဖြင့် ဖြည်းဖြည်းချင်း အစားထိုးတိုက်ကျွေးပါ။
• ကလေးငယ်၏ အရိပ်အကဲ နှင့် လိုက်ပါဆောင်ရွက်နိုင်စွမ်းကို လေးစားပါ- နို့ဖြတ်ခြင်းလုပ်ငန်းစဉ်တစ်လျှောက်လုံးတွင် သင့်ကလေး၏ အရိပ်အကဲ နှင့် သူ၏လိုလားချက်များကို အစဉ်မပြတ် သတိထားစောင့်ကြည့်ပြီး ကလေးအပေါ်မူတည်၍သာ နို့ကို ဖြည်းဖြည်းချင်း ဖြတ်ရမည်။

နို့ဖြတ်သည့် အချိန်အတွင်း မိခင်ရော ကလေးပါ ဝမ်းနည်းခြင်း၊ သက်သာရာရခြင်း၊ အပြစ်ရှိသလို ခံစားရခြင်း နှင့် စိုးရိမ်ထိတ်လန့်ခြင်း စသည့် ခံစားအမျိုးမျိုးကို တွေ့ကြုံခံစားရလေ့ရှိသည်။ ထိုကဲ့သို့သော ရှုပ်ထွေးနေသော ခံစားချက်များသည် ပုံမှန်ဖြစ်ပြီး ထိုအရာများကို ရင်ဆိုင်ကျော်လွှားနိုင်ရန် အောက်ပါအချက်များတွင် ဖော်ပြထားသည်။

• သင့်ခံစားချက်များကို အသိအမှတ်ပြုပါ- နို့ဖြတ်သည့်အချိန်တွင် ဆုံးရှုံးသလိုခံစားရခြင်း (သို့) ဝမ်းနည်းခြင်းများသည် ပုံမှန်ဖြစ်စဉ်ဖြစ်သည့်အတွက် ရှေ့လျောက်တွင်မိခင်နှင့် ကလေးအတွက် ပိုမိုကောင်းမွန်သော အပြောင်းအလဲများဖြစ်လာမည်ကို မျှော်လင့်ပြီး သင့်အနေနဲ့ အပြစ်ရှိသလို မခံစားသင့်ဘဲ သင်၏ခံစားချက်များကို အသိအမှတ်ပြုပါ။
• သင့်ကို ပံ့ပိုးပေးနိုင်သောကွန်ရက်နှင့် ဆက်သွယ်ပါ- သင့်လုပ်ဖော်ကိုင်ဖက်၊ မိသားစုဝင်များ၊ သူငယ်ချင်းများ၊ သို့မဟုတ် စာနာမှု၊ အားပေးမှုနှင့် လုံခြုံစိတ်ချမှုတို့ကို ပေးစွမ်းနိုင်သော ပံ့ပိုးကူညီမှုအဖွဲ့များနှင့် သင်ခံစားနေရသော ခံစားချက်များနှင့် စိုးရိမ်မှုများကို မျှဝေပါ။
• မိမိကိုယ်ကို ဂရုစိုက်ပါ- နို့ဖြတ်သည့် လုပ်ငန်းစဉ်အတွင်း သင်၏ ရုပ်ပိုင်းဆိုင်ရာ၊ စိတ်ခံစားမှုများနှင့် စိတ်ပိုင်းဆိုင်ရာ သုခချမ်းသာကို ပြုစုပျိုးထောင်ရန်အတွက် မိမိကိုယ်ကို စောင့်ရှောက်နိုင်မည့်အရာများကို ဦးစားပေးလုပ်ဆောင်ပါ။ သင့်အတွက် အဆင်ပြေသော လေ့ကျင့်ခန်းပြုလုပ်ခြင်း၊ ဝါသနာပါသောအရာများကို ပြုလုပ်ခြင်း သို့မဟုတ် ချစ်ရသူနှင့် အချိန်ဖြုန်းခြင်း စသဖြင့် သင့်ကို ပျော်ရွှင်စေပြီး အပန်းပြေစေမည့်အရာများကို ဆောင်ရွက်ပါ။
• နို့တိုက်ခဲ့သည့်အချိန်များအတွက် အောင်ပွဲခံပါ- နို့တိုက်ခဲ့သည့် အချိန်တစ်လျှောက်လုံး သင်၏ ကလေးနှင့် သင့်အကြား တည်ဆောက်နိုင်ခဲ့သော ချစ်ခြင်းမေတ္တာ နှင့် သင်ဖြည့်ဆည်းပေးခဲ့သည့် ကလေးအတွက် အာဟာရများသည် အဖိုးမဖြတ်ပေ။ ထို့ကြောင့် သင်၏ ထိုအကောင်းဆုံးသော အချိန်များကို ပြန်လည်စဉ်းစားပြီး သင်လုပ်ဆောင်နိုင်ခဲ့သည့်အတွက် မိမိကိုယ်ကို ဂုဏ်ယူပါ။
• မိမိကိုယ်ကို စိတ်ရှည်ပြီး သနားကြင်နာပါ- နို့ဖြတ်ခြင်းလုပ်ငန်းစဉ်တစ်လျှောက်လုံးတွင် ကလေးအပေါ်တွင်သာမက မိမိကိုယ်ကိုလည်း စိတ်ရှည်ပြီး သနားကြင်နာပါ။ နို့ဖြတ်ခြင်းသည် အချိန်ကြာနိုင်ပြီး နှစ်ဦးလုံးအတွက် ညှိနှိုင်းဆောင်ရွက်ရန် လိုအပ်ကြောင်း အသိအမှတ်ပြုပါ။

သင့်ကလေး၏ အရိပ်အကဲများကို သတိထားစောင့်ကြည့်ခြင်း၊ နို့ကို ဖြည်းဖြည်းချင်းအချိန်ယူဖြတ်ခြင်းနှင့် ကိုယ့်ကိုယ်ကို သနားကြင်နာကာ ဂရုစိုက်စောင့်ရှောက်ခြင်း များအားဖြင့် သင်နှင့် သင့်ကလေး၏ လိုအပ်ချက် နှင့် ခံစားချက်များကို လေးစားခြင်းဖြင့် နို့ကို ကောင်းမွန် အောင်မြင်စွာ ဖြတ်နိုင်မည် ဖြစ်သည်။